Hin stóra ákvörðun Harry og Meghan

Hertogahjónin af Sussex tilkynntu í gær að þau muni á næstunni vinna að því að breyta hlutverki sínu innan bresku konungsfjölskyldunnar. Í tilkynningunni tala þau um að þau ætli að draga sig í hlé sem „senior“ meðlimir konungsfjölskyldunnar og vilji verða fjárhagslega sjálfstæð. Einnig stefna þau að því að verja meira af tíma sínum í Norður-Ameríku. Tilkynningin kemur virkilega á óvart og er í sönnum anda hertogahjónanna sem oft hafa farið nýjar leiðir og vikið frá gömlum venjum bresku konungsfjölskyldunnar.

Tilkynningin kom jafnvel sjálfri konungsfjölskyldunni á óvart. Buckinghamhöll gaf út yfirlýsingu í gærkvöldi um að þessi ákvörðun Harry og Meghan væri á grunnstigi og að það væri margt framundan sem þarf að ræða og fara yfir, enda er þetta mjög einstakt og flókið mál að mörgu leyti. BBC greindi einnig frá því að tilkynning hertogahjónanna hefði verið gefin út án þess að talað hefði verið við Elísabetu Bretadrottningu eða einhvern af hennar starfsliði. Í raun hafi enginn annar meðlimur konungsfjölskyldunnar vitað af því að tilkynningin yrði gerð opinber.

 

 

 

View this post on Instagram

A post shared by The Duke and Duchess of Sussex (@sussexroyal) on Jan 8, 2020 at 10:33am PST

 

Hvað er „senior“ meðlimur konungsfjölskyldunnar?

Margt sem viðkemur bresku konungsfjölskyldunni getur verið erfitt að þýða yfir á íslensku en þýða má hugtakið sem heldri meðlimir konungsfjölskyldunnar. Einfalda útskýringin er sú að þetta eru allir þeir meðlimir konungsfjölskyldunnar sem sinna opinberum skyldum af hálfu drottningarinnar. Hins vegar er þetta aðeins flóknara en það því samkvæmt hefðum konungsfjölskyldunnar þá á þetta við um þá meðlimi sem eru hærra settir, eru meira í sviðsljósinu og sinna fleiri opinberum skyldum. Í raun má segja að þetta eru þeir meðlimir sem almenningur verður hvað mestur var við, þ.e.a.s. drottningin og nánustu erfingjar hennar. Þessir meðlimir konungsfjölskyldunnar eru einnig þeir sem fá hvað mestan pening frá ríkisstjórninni.

 

Af hverju að taka þessa ákvörðun?

Í fyrra voru hertogahjónin mikið gagnrýnd af hinum ýmsu ástæðum og má segja að mikið drama hafi verið í kringum þau en fólk var jafnvel farið að velta því fyrir sér hvort þau myndu segja sig alfarið úr konungsfjölskyldunni.

Þessi tilkynning Harry og Meghan útskýrir margt sem þau hafa verið að gera undanfarið ár sem margir hafa furðað sig á. Að mörgu leyti hafa Harry og Meghan verið að ýja að ákvörðuninni síðan þau giftu sig. Þau hafa verið að kalla eftir auknum rétti til einkalífs og hafa takmarkað aðgang fjölmiðla að t.d. fæðingu og skírn sonar þeirra. Einnig var það gefið út að Archie myndi ekki bera neinn konunglegan titil, sem er óvenjulegt miðað við stöðu foreldra hans. En þessar ákvarðanir hafa einmitt verið gagnrýndar á þeim grundvelli að þau fái pening frá skattborgurum. Hefur sú gagrýni eflaust ýtt undir þessa ákvörðun þeirra.

Í tilkynningunni er bent á nýja heimasíðu hertogahjónanna, sussexroyal.com, en þar má finna mikið af upplýsingum og svörum um þessa ákvörðun. Á síðunni tala þau um að fjárhagurinn sé ein helsta ástæðan fyrir þessari ákvörðun. Þessi breyting muni leyfa þeim að vera sjáfstæðari og taka við launum fyrir störf sín. Þau fara mjög vel yfir fjármál konungsfölskyldunnar á síðunni og útskýra þar hvernig kerfið virkar. Fjármál konungsfjölskyldunnar eru þó flókið fyrirbæri og efni í annan pistil! Í stuttu máli, þá taka þau ekki við neinum launum í því starfi sem þau eru núna, en fá styrk frá bresku ríkistjórninni sem meðlimir konungsfjölskyldunnar í fullu starfi.

Til að draga saman er ástæðan sú að þau vilji vera sjálfstæðari og vilji vinna að fleiri verkefnum sem eru ótengd konungsfjölskyldunni.

 

Hvert verður hlutverk Harry og Meghan núna?

Það má segja að Harry og Meghan séu að gera konunglega hlutverkið að hlutastarfi. Við munum ennþá sjá töluvert af þeim, en í allt öðruvísi hlutverki og minna í verkefnum sem tengjast konungsfjölskyldunni. Þau eru bæði mjög þekkt og munu ávallt vera í sviðsljósinu að einhverju leyti. Hertogahjónin eru með ýmis verkefni á prjónunum og er Harry prins t.d. að búa til sjónvarpsþætti með Oprah sem munu fjalla um andlega heilsu.

Þau munu halda konunglegu titlunum sínum og eru til fordæmi um að meðlimir konungsfjölskyldunnar vinni fullt launað starf og haldi konunglegum titli, t.d. er prinsessurnar Beatrice og Eugenie báðar í fullu starfi en eru ennþá með sína titla. Prinsessurnar teljast ekki sem heldri meðlimir konungsfjölskyldunnar.

Líklegt er að þau muni flytja til Kanada og vera þar meirihluta ársins og síðan koma til Bretlands til að sinna opinberum heimsóknum. Undanfarnar vikur hafa hertogahjónin verið í fríi í Kanada, en Meghan bjó þar áður en þau giftu sig.

Þessi breyting á hlutverki þeirra mun gefa þeim meira vald og meira sjálfstæði til að taka ákvarðanir og höllin mun hafa minna svigrúm til þess að stjórna því hvað þau gera.

 

Hvað finnst fólki um þetta?

Þó svo að heimasíða Harry og Meghan svari mörgum spurningum þá er margt sem er óskýrt. Ekki er tekið fram hvaða skyldum þau muni sinna fyrir drottninguna og hversu oft þau muni koma opinberlega fram.

Ákvörðun þeirra er að mörgu leyti farin að vera umdeild, sérstaklega í ljósi þeirra upplýsinga að þetta hafi ekki verið gert í samráði við konungsfjölskylduna. Margir vilja meina að ákvörðunin sé komin frá Meghan og byrjaði myllumerkið #Megxit að ganga í gærkvöldi á samfélagsmiðlum, í tengingu við Brexit. En það má alls ekki draga úr því að Harry prins hefur ávallt haft orð á því að hann sé ekki hrifinn af sviðsljósinu og hinu stranga hlutverki sem fylgir því að vera í konungsfjölskyldunni. Því má ganga út frá því að þetta sé ákvörðun þeirra beggja.

Margar tilgátur hafa komið fram um ástæðu þess að þau hafi ekki látið neinn innan konungsfjölskyldunnar vita. Ein þeirra er sú að það hafi verið til þess að viðræður um breytt hlutverk þeirra yrðu haldnar á þeirra forsendum, sem er auðveldara þegar almenningur veit af þessu og hefur væntingar byggðar á upplýsingum frá Harry og Meghan.

Flestir eru þó ennþá að átta sig á því hvað þetta þýðir og hvað muni gerast næst. Verður því mjög áhugavert að fylgjast áfram með þessu máli og sjá hvernig það þróast.

Meghan og Katrín báðar í bláu

Það mætti halda að þær svilkonurnar Katrín og Meghan hafi lagt á ráðin um litaval fyrir heimsóknir dagsins en báðar voru þær klæddar bláu.

Katrín og Vilhjálmur mættu í gærmorgun til að fagna nýjum góðgerðarsamtökum sem munu veita fjárhagsaðstoð þegar um er að ræða stærri neyðartilvik eins og náttúruhamfarir. Katrín var klædd kóngabláum kjól frá Emilia Wickstead og svörtum skóm með svart veski. Í nóvembermánuði bera nær allir Bretar draumsóley í barmi til minningar um alla þá sem hafa látist fyrir landið. Katrín var hinsvegar með sérstaka nælu í barminum sem var hönnuð til minningar þeirra kvenna sem tóku þátt í fyrri heimstyrjöldinni. Vindurinn var því miður eitthvað að stríða hertogaynjunni af Cambridge sem valdi að hafa hárið slegið.

Meghan og Harry voru viðstödd minningarathöfn við Westminister Abbey en þar hefur verið útbúið svæði þar sem fólk getur skilið eftir skilaboð til fallinna ástvina. Harry klæddist sama einkennisbúningi og þegar hann gekk að eiga Meghan. Meghan sjálf var í dökkblárri kápu og svörtum kjól ásamt háum Victoria Beckham stígvélum. Meghan var glæsileg, enda í lit sem fer henni mjög vel og stóðu hertogahjónin sig með prýði. Það vakti þó athygli að Kamilla, hertogaynjan af Cornwall, átti einnig að vera með í för en hún varð að hætta við þar sem hún hefur verið að glíma við slæmt kvef.

Hertogahjónin af Cambridge og Sussex voru önnum kafin í gær og munu vera það næstu daga enda hefur konungsfjölskyldan mikið fyrir stafni þessa dagana. Nóvembermánuður í Bretlandi er tileinkaður öllum þeim sem látið hafa lífið í þjónustu fyrir landið og er sérstaklega minnst allra sem létust í fyrri og seinni heimstyrjöldinni. Minningarviðburðirnir ná hámarki á sunnudaginn en sú athöfn á sér ávallt stað á þeim sunnudegi sem er næstur 11. nóvember. Það mun vera fyrsti viðburðurinn sem við sjáum þá bræðurna saman eftir að Harry tók það fram í nýrri heimildamynd að samband hans og Viljálms væri ekki eins og það hefði áður verið.

 

 

 

View this post on Instagram

A post shared by The Duke and Duchess of Sussex (@sussexroyal) on Nov 7, 2019 at 6:16am PST

 

 

 

 

View this post on Instagram

A post shared by Kensington Palace (@kensingtonroyal) on Nov 7, 2019 at 8:41am PST

Hvað er í gangi með Harry og Meghan?

Ein helsta spurning sem ég fæ þessa daganna er, hvað er í gangi með Harry og Meghan? Það er engin furða að fólk spyr sig, enda virðist alltaf eitthvað nýtt vera að koma fram. Það nýjasta er heimildamynd sem ITV frumsýndi um seinustu helgi, en myndin fylgir hertogahjónunum af Sussex í konunglegri ferð þeirra um Afríku. Þau hjónin gáfu leyfi fyrir myndinni og koma fram í stuttum viðtölum þar sem þau tala opinskátt um ferðina og líðan sína undanfarið ár. Tilgangur myndarinnar er augljóslega sá að Harry og Meghan eru að sýna sína hlið á hlutunum, en fyrr í mánuðinum gáfu þau út yfirlýsingu um að þau eru að kæra ákveðna fjölmiðla fyrir slæman fréttflutning. Það er því um að gera að fara yfir það helsta sem kom fram í myndinni og hvað það þýðir.

Harry og Meghan opna sig og segja frá slæmri líðan
Áður en myndin var frumsýnd voru gefin út atriði sem sýndu Harry og Meghan opna sig um andlega líðan og kom þetta því ekki á óvart. Í myndinni talar Harry um hvernig starfið sem hann er í minnir hann stanslaust á það hvernig móðir hans lést og hvernig það hefur áhrif á hann enn í dag. Meghan talaði um hversu erfitt það hefur verið að venjast því að vera í hinu konunglega sviðsljósi. Við höfum áður heyrt Harry opna sig um andlega erfiðleika en þetta í fyrsta sinn sem Meghan segir frá sinni líðan. Meghan talaði um það að hún hafi hingað til reynt að vera með hið breska viðhorf, að halda alltaf ró sinni, en að þetta sé bara orðið of mikið. Orð hennar eru sérstaklega eftirminnileg þegar hún segir: "Ég vissi að þetta yrði erfitt en ég hélt að þetta yrði sanngjarnt".

En hefur þetta verið svo afskaplega slæmt fyrir Meghan?
Líf Meghan hefur gjörbreyst á undanförnu einu og hálfu ári eða svo. Hún hefur flust milli landa, gift sig og eignast barn, breytingar sem eru miklar fyrir í raun hvern sem er.Síðan bættist við nýtt hlutverk sem hertogaynja og hún fékk starfstitillinn prinsessa Bretlands. Því að vera eiginkona Harry fylgir að vera stanslaust í sviðsljósinu og ekki er hægt að líta fram hjá því að hún og Harry eru af sitthvorum kynþættinum sem mikið hefur verið fjallað um, en hún er fyrsti meðlimur bresku konungsfjölskyldurnar sem er ekki hvít á hörund. Ofan á þetta hafa komið fram ótal margar sögur um hana sem ekki eru sannar. Í kringum brúðkaupið var samband hennar og föður hennar mikið í fréttum og má alveg segja að það hafi gengið of langt. Eftir það komu fréttir um ósætti milli hennar og Katrínar, hertogynjunnar af Cambridge, og fleiri sögur um að Meghan væri erfið í starfi og að starfsfólk hallarinnar væri orðið mjög þreytt á henni. Mikið af þessu er algjör uppspuni og ekki byggt á neinum sannindum.

Samfélagsmiðlar hafa líka haft áhrif en í fyrra gaf Buckinghamhöll út yfirlýsingu með velsæmisreglum fyrir samfélagsmiðla sína. Konungsfjölskyldan hefur mikið notað samfélagsmiðla undanfarin ár en þetta var stórt skref og eitthvað sem áður hefur ekki verið þörf fyrir.. Er þetta svar hallarinnar við hinum ótal athugasemdum sem birtast þar, þar sem talað er illa um Meghan? Því miður þarf ekki að skoða þessa aðganga lengi til að átta sig á að svona reglur eru nauðsynlegar.

Því miður er ekki hægt að neita því að mikið af mótlætinu sem Meghan hefur fengið er vegna húðlitar hennar. Sögurnar sem hafa verið búnar til um hana byggja oft á því að hún sé skapstór og heimtusöm og að það sé erfitt að vinna með henni. Þegar Meghan starfaði sem leikkona komu aldrei neinar svipaðar sögur um hana og komu svona sögusagnir bara fram eftir að hún giftist Harry. Eins og Meghan sagði sjálf í myndinni, þá finnst henni þetta ósanngjarnt þar sem hún er bara að gera sitt besta í nýju hlutverki á meðan fjölmiðlar birta endalausar lygar um hana. Við hér á Íslandi höfum ef til vill ekki heyrt allar sögusagnirnar um Meghan, en margar þeirra hafa birst hérna og við því fengið keim af þeim.

 

 

 

View this post on Instagram

A post shared by The Duke and Duchess of Sussex (@sussexroyal) on Oct 2, 2019 at 5:26am PDT

Minning Díönu vakir yfir
Mikið af heimsóknum Harry í Afríku voru gerðar til minningar um móður hans, Díönu prinsessu, og minntist hann mikið á hana í ræðuhöldum og í heimildamyndinni. Í yfirlýsingunni um kærurnar, sem gefin var út á seinasta deginum þeirra í Afríku, talar hann um að hann vilji ekki endurtaka söguna. Hann vill ekki sjá það sem gerðist við móður hans gerast við eiginkonu sína. Það er vel vitað að Harry og Vilhjálmur voru oft vitni að því að sjá móður þeirra gráta vegna álags og þeir vissu að henni leið mjög illa. Harry talar um að það að hafa orðið faðir hafi orðið til þess að hann vilji standa upp á móti óréttlætinu og stoppa svona einelti af hálfu fjölmiðla. Orð hans um að vilja ekki taka þátt í leiknum sem drap móður hans sitja eftir í manni.

Vilhjálmur með áhyggjur af bróður sínum
Harry í raun staðfesti það í heimildamyndinni að þeim bræðrum kæmi ekki svo vel saman þessa daganna, en tók það líka fram að mikið væri að gera hjá þeim báðum og sambandið væri allt öðruvísi en það hefði verið. Strax og myndin kom út byrjuðu fjölmiðlar að segja frá því að Vilhjámur prins væri með áhyggjur af bróður sínum. Það er hægt að lesa þetta á tvo vegu, annars vegar að Vilhjálmur sé að taka undir það sem margir fréttaskýrendur konungsfjölskyldunnar segja, en það er að Harry og Meghan séu sífellt að fá fjölmiðla upp á móti sér, sem leiðir til enn meiri togstreitu. Hins vegar er auðvelt að lesa þetta þannig að Vilhjálmur hafi áhyggjur af bróður sínum sem opinberlega talar um að honum líði illa andlega.

Hvar endar þetta?
Kæran, eða kærurnar mætti frekar segja, munu fara fyrir rétt og verður áhugavert að sjá hvernig það mál fer. Ef Harry og Meghan vinna öll málin mun það setja ákveðinn tón fyrir alla fjölmiðla. Samt sem áður hafa margir áhyggjur af því að þessi herferð þeirra muni fá þá fjölmiðla sem hafa verið að búa til sögur um þau enn frekar upp á móti þeim. Þessi aðferð Harry og Meghan, að tala opinskátt um tilfinningar sínar, er ekki beint í anda eldri kynslóða konungsfjölskyldunnar en hún hefur að mörgu leyti tileinkað sér mottóið „aldrei kvarta, aldrei útskýra (e. never complain, never explain)“. Þó svo að þessi opinbera umræða um andlega líðan Harry og Meghan muni ef til vill fara illa í eldri kynslóðir, þá er spurningin sú hvort þessi herferð þeirra muni ekki verða til þess að yngra fólk muni frekar sýna þeim skilning en það gæti tryggt vinsældir konungsfjölskyldunnar til framtíðar.

 

 

 

View this post on Instagram

A post shared by The Duke and Duchess of Sussex (@sussexroyal) on Sep 6, 2019 at 5:57am PDT

Formúla sem klikkar ekki fyrir verðandi konung og drottningu

Katrín og Vilhjálmur, hertogahjónin af Cambridge, hafa undanfarna daga verið í konunglegri heimsókn í Pakistan. Pakistan er eitt af þeim löndum sem er hluti af Breska samveldinu og mikilvægt að rækta sambandið milli ríkjanna með konunglegum heimsóknum. Heimsóknin hefur verið frekar óhefðbundin en lítið hefur verið gefið upp um dagskrá hertogahjónanna fyrirfram útaf öryggisástæðum. Einn heimsóknin var í krikketskóla í borginni Lahore og tóku hertogahjónin þar einn leik. Af myndunum að dæma skemmtu hjónin sér konunglega, og er svona heimsókn klassísk fyrir hertogahjónin og klikkar seint. 

 

 

 

View this post on Instagram

 

 

 

A post shared by Kensington Palace (@kensingtonroyal) on Oct 17, 2019 at 9:06am PDT

 

Það er skemmtilegt að segja frá því að í næstum hverri konunglegri ferð sem Vilhjálmur og Katrín fara erlendis er einhverskonar íþróttaheimsókn þar sem þau bregða á leik. Þau eru bæði mikið fyrir íþróttir og full af keppnisskapi. Þau njóta sín mikið í íþróttum og í þessum heimsóknum má sjá hvernig formlegheitin í kringum þau verða aðeins minni.

Í raun má segja að íþróttaheimsókn fyrir Vilhjálm og Katrínu sé formúla sem klikkar ekki. Myndirnar eru alltaf skemmtilegar en oft er mikið um góða og skrítna svipi. Það sést að þau eru afslappaðari og eru að skemmta sér. Fólk sér þau sem venjulegt fólk og tengir þar af leiðandi meira við þau. Eins og ég segi, formúla sem klikkar ekki fyrir verðandi konung og drottningu.

Fleiri eftirminnilegar íþróttaheimsóknir eru t.d. hokký heimsókn í Kanada árið 2011. En það var fyrsta konunglega ferðin þeirra eftir að þau giftu sig og urðu hertogahjónin af Cambridge. Árið 2012 heimsóttu þau líka meðal annars Tuvalu og tóku þar nokkur spor með innfæddum. Árið 2014 fóru þau í heimsókn til Nýja Sjálands og spiluðu þar einmitt líka krikket, en þá spilaði hertogaynjan á hælum!

Sama ár heimsóttu þau Frakkland þar sem þau horfðu á ruðningsleik og fyrir leikinn kíktu þau á krakka sem æfa íþróttina og tóku smá þátt.


Árið 2014 fóru þau í stutta heimsókn til Bandaríkjanna og horfðu á körfuboltaleik, en sú heimsókn var líka eftirminnileg en það var þá sem hertogahjónin hittu Beyoncé og Jay-Z. Árið 2016 heimsóttu þau Indland og Bútan, og léku krikket, prófuðu smá fótbolta og í Bútan prófuðu þau einnig bogfimi. Allt tilefni sem hafa verið mjög eftirminnileg og skemmtileg.

Katrín sýnir Meghan stuðning

Katrín, hertogaynja af Cambridge var á dögunum í heimsókn í Southwark í London til að fræðast meira um góðgerðarsamtök sem styðja við börn og ungar mæður. Fataval hennar vakti athygli mína en það minnir töluvert á fataval mágkonu hennar, hertogaynjunnar af Sussex.

Katrín var mætt í buxum og skyrtu, en hún klæðist vanalega kjólum, pilsum og kápum við svipuð tilefni. Það er sjaldséð að sjá hana í buxum og er það frekar Meghan sem klæðir sig þannig. Einnig er erfitt að hunsa þá staðreynd hversu stutt er síðan fatalína Meghan kom út og er klæðnaður Katrínar mikið í sama stíl og línan.

Það er erfitt að álíta að klæðnaðurinn við þetta tilefni sé tilviljun, en konunglegur klæðnaður er iðulega skipulagður af mikilli nákvæmni, eftir því hvert tilefnið er og eftir því hverjar aðstæðurnar eru. Fataval Katrínar er því auðveldlega hægt að túlka sem ákveðna samstöðu við mágkonu sína sem hefur fengið talsvert slæma umfjöllun og gagnrýni síðan hún giftist inn í konungsfjölskylduna.

Lengi vel var talið að slæmt væri á milli hertogaynjanna, sem þróaðist út í að slæmt væri milli eiginmanna þeirra, prinsana Harry og Vilhjálms. Það hefur átt sé augljós framför í sambandi hertogahjónana undanfarið ár eftir að þau byrjuðu að vinna minna saman sem og fluttu í sitthvorann bæinn. Einnig er talið að samband þeirra hafi styrkst talsvert eftir að Harry og Meghan urðu foreldrar. Getur fataval Katrínar í dag stutt þá kenningu og sýnt að sambandið er að batna.

Heimsóknin í dag er hluti af verkefni Katrínar um að styðja við verkefni og starfsemi sem huga að þroska ungra barna. Verkefnið hennar kallast ‘Yngri árin’ (e. Early Years) og er eitt af þeim verkefnum sem Katrín styður hvað helst. Er það hluti af verkefni Katrínar að fræða fólk um hvað er hægt er að gera til að hlúa að ungum börnum til að styrkja andlegri heilsu þeirra í framtíðinni.

Katrín fullkomnaði útlitið með skóm frá hönnuðinum Gianvoti Rossi, en þeir eru með þykkari hæl en hún er vanalega í. Skemmtilegt er að segja frá því að þó skórnir sem hertogaynjan klæddist í dag kosti um 80 þúsund íslenskar krónur (520 pund), þá er þessa daganna hægt að finna svipaða skó í verslunum H&M ef áhugi er fyrir að stela stílnum.


Myndband frá deginum í dag:

 

 

 

View this post on Instagram

 

 

 

A post shared by Kensington Palace (@kensingtonroyal) on Sep 19, 2019 at 8:38am PDT

 

Konunglegu mágkonurnar á góðri stundu á Wimbledon í sumar:

 

 

 

View this post on Instagram

 

 

 

A post shared by Kensington Palace (@kensingtonroyal) on Jul 13, 2019 at 8:19am PDT

Fatalína Meghan:

 

 

 

View this post on Instagram

 

 

A post shared by The Duke and Duchess of Sussex (@sussexroyal) on Sep 12, 2019 at 5:08am PDT

Harry prins svarar fyrir sig

Harry prins hefur verið mikið gagnrýndur undanfarið fyrir að ferðast um á einkaþotu í sumar og svaraði loksins fyrir það seinastliðinn þriðjudag. Breski prinsinn hefur verið mikill talsmaður umhverfismála undanfarið og nefndi t.d. í viðtali á dögunum að hann og Meghan ætli sér bara að eignast tvö börn af umhverfisástæðum.

Harry var í vikunni staddur í Amsterdam að kynna nýtt samvinnuverkefni sem hann hefur verið að vinna að sem snýst um að hjálpa ferðamálaiðnaðinum að verða sjálfbærari. Verkefnið nefnist Travalyst og er unnið af stórum ferðafyrirtækjum eins og t.d. Booking.com og TripAdvisor. Verkefnið er fyrsta stóra verkefnið sem Sussex góðgerðarsjóðurinn styrkir en Harry og Meghan stofnuðu þann sjóð eftir að hafa skilið við sameiginlegan sjóð sem þau áttu með hertogahjónunum af Cambridge, Vilhjálmi og Katrínu. Hvað verkefnið samt nákvæmlega gerir er en nokkuð óljóst en verður áhugavert að fylgjast með því í framtíðinni.

 

 

 

View this post on Instagram

 

A post shared by The Duke and Duchess of Sussex (@sussexroyal) on Sep 3, 2019 at 7:24am PDT

 

Á kynningarfundinum var Harry eðlilega spurður út í sín eigin ferðalög og þá gagnrýni um að hann notist mikið við einkaþotur. En Harry mætti t.d. á einkaþotu á loftlagsráðstefnu í sumar. Svar Harry var einfalt, hann segist notast mikið við almennt farþegaflug og reyni það eftir bestu getu, en þegar kemur að fjölskyldu hans séu ákveðin öryggisatriði sem þarf að uppfylla og þau verði þá að notast við einkaþotur. Viðurkenndi Harry að það að vera umhverfisvænn væri ekki alltaf auðvelt og að enginn væri fullkominn í þeim efnum. Nefndi hann þennan sama punkt í ræðu sinni um verkefnið og ferðamálaiðnaðinn.

Harry var mjög rólegur í svari sínu og telja margir að hann hafið talað af mikilli fullvissu og var málið ekki rætt meira eftir svar hans. Svarið hans er nokkuð gott og án efa búið að undirbúa það vel, enda málið búið að vera lengi á milli tannana á fólki. Hægt er að sjá svarið hans hér fyrir neðan.

 

Kóngafólk og flug hefur verið talsvert rætt undanfarið en Vilhjálmur og Katrín sáust í seinasta mánuði notast við almennt farþegaflug með börnunum sínum þegar þau flugu til Skotlands að heimsækja Elísabetu drottningu í Balmoral. Var þetta um svipað leiti og Meghan og Harry notuðust við einkaþotur. Erfitt er þó að bera ferðalögin saman, en Cambridge fjölskyldan var að fara í stutt flug innan Bretlands meðan Harry og Meghan voru að ferðast langar leiðir milli landa með Archie aðeins nokkra mánaða.

Ferðalög konungsfjölskyldunnar eru skipulögð langt fram í tímann og er margt sem þarf að hafa í huga þegar kemur að þeim. Öryggi er stór hluti sem og hver borgar fyrir ferðalagið. Sem dæmi þá flugu Harry og Meghan flugu á almennu farrými þegar þau flugu milli Ástralíu og Nýja-Sjálands í fyrra í opinberri heimsókn, en þá var það ríkisstjórn Nýja Sjálands sem borgaði flugið. Þegar þau notuðust við einkaþotu í sumar til að fara til Frakklands var það Elton John sem bauð þeim sína þotu og borgaði brúsann. Samt sem áður hafa ferðalög hertogahjónana af Sussex komið illa út fyrir þau í sumar og hafa þau sjálf lítið svarað þessari gagnrýni og var flott að sjá Harry loksins tækla þetta mál.

Andrew prins býr til vandræði

Þessa daganna hefur mál Jeffrey Epstein haft afleiðingar fyrir bresku konungsfjölskylduna en Andrew prins hefur orðið fyrir mörgum ásökunum í málaferlum bandaríska fjárfestsins. Upp hafa komið myndbönd og vitni sem gefa til kynna að prinsinn hafi vitað um mansal og vændissölu Epsteins.

Buckinghamhöll hefur afneitað öllum ásökunum á hendur Andrew síðan málið kom fyrst upp, og á dögunum kom út yfirlýsing frá prinsinum sjálfum. Þar neitar hann allri vitneskju um mál Epstein og að hann hafi ekki haft neinn grunn um hvernig maður Epstein væri í raun. Yfirlýsingin er að mörgu leiti illa orðuð og gefur til kynna að hún hafi verið gefin út í miklum flýti, enda ásakanirnar á hendum prinsins að verða alvarlegri og alvarlegri.

Andrew prins er þriðja barn Elísabetar drottningar og hefur oft verið talið að hann sé uppáhalds barn hennar. Hann var giftur Söru Ferguson í 10 ár, en þau skildu árið 1996 og hefur samband þeirra mikið verið í fjölmiðlum, sérstaklega undanfarið þar sem þau virðast vera byrjuð aftur saman. En Elísabet drottning er núna í fríi í Balmoral kastala í Skotlandi og var Andrew með henni þar í nokkra daga og sást hún með honum opinberlega sem margir vilja meina að sé hennar leið til að sýna honum stuðning.

 

 

 

View this post on Instagram

A post shared by The Duke of York (@hrhthedukeofyork) on Jul 4, 2019 at 1:03am PDT

Konungsfjölskyldan er vernduð af lögunum en ekki er hægt að ákæra meðlimi hennar í einkamálum. Drottningin sjálf nýtur friðhelgi, enda eru öll sakamál ákærð í hennar nafni. Hinsvegar hljóma bresk lög einnig upp á það að ekki má handataka neinn í návist drottningarinnar, né innan hallar sem hún kallar heimili. Ef svo skildi að ásakanir á hendur Andrews prins yrðu alvarlegri gæti reynst erfitt fyrir lögregluna að ná tali af honum, yrði hann innan hallarveggja konungsfjölskyldunnar. Það er þó ólíklegt til að eiga sér stað þar sem prinsinn hefur gefið í skyn að hann sé tilbúinn til að tala við lögregluna ef þess sé óskað og ásakanirnar virðast ekki vera meira en bara ásakanir. 

Hvort sem ásakanirnar séu sannar eður ei, þá er erfitt að neita þeim sönnungargögnum sem koma fram og að Andrew hafi ekki einhvern tímann orðið vitni eða hitt fórnarlamb Epstein, hvort sem hann hafi verið meðvitaður um það eða ekki.

Ásakanirnar á hendur Andrew hafa líka bitnað á dætrum hans, en yngri dóttir Andrews, Eugenie prinsessa kom af stað herferð í fyrra sem berst á móti mansali með því að vekja athygli á vandamálinu og fá fólk til að vera meðvitað um það. Hefur hún fengið mikla gagnrýni á Instagram aðgang sinn þar sem fólk setur inn athugasemdir um föður hennar.

 

 

 

View this post on Instagram

I co-founded @the_anti_slavery_collective to bring together change-makers to raise awareness for modern slavery as a global epidemic. Today I met an incredible organisation, @stopthetraffik, who are empowering people to take action against #humantrafficking. Their intelligence led STOP APP is the only one of its kind to combine community empowerment, big data management and anti-trafficking expertise to disrupt this horrific crime. #enditmovement

A post shared by Princess Eugenie (@princesseugenie) on Feb 18, 2019 at 7:05am PST

Harry varð brjálaður út í Vilhjálm

Ný heimildamynd um prinsana af Wales, Vilhjálm og Harry var frumsýnd um seinustu helgi í Bretlandi og ber heitið William and Harry: Princes at War. Myndin fjallar um meint ósætti bræðranna, en dramatískur titillinn gefur til kynna að um einhvers konar stríð sé að ræða. Í júní síðastliðnum var það gefið út að góðgerðarsjóður sem þeir bræður stofnuðu saman myndi hér með einungis vera undir stjórn Cambridge hjónanna. Hefur sú ákvörðun í raun staðfest að eitthvað ósætti sé á milli hertogahjónana beggja sem hefur orðið til þess að þau vilja ekki vinna saman.

 

 

 

 

 

View this post on Instagram

 

 

 

A post shared by Kensington Palace (@kensingtonroyal) on Mar 12, 2018 at 11:52am PDT

 

Heimildamyndin fjallar um að þetta ósætti sé á milli bræðanna og fer yfir samband þeirra bræðra í gegnum árin. Inn á milli eru viðtöl við fólk sem hefur lengi starfað sem konunglegir blaðamenn eða hafa jafnvel unnið við hirðina og þannig fylgst með þeim bræðrum vaxa úr grasi. Harry og Vilhjálmur hafa alltaf verið nánir en þeim hefur ósjaldan lent saman eins og mörgum systkinum er eðlislægt. Brúðkaup Harry og Meghan varð þó að miklu deilumáli milli bræðranna, og á það að hafa verð upphafið á því brotna sambandi sem er á milli þeirra í dag.

 

Vilhjálmur á að hafa varað Harry við að giftast Meghan eftir stutt samband og varð Harry ósáttur við bróður sinn útaf því. Hann á í raun að hafa verið mjög reiður, og samkvæmt viðtölum í myndinni, töluðust bræðurnir ekki við í einhvern tíma eftir að þeir áttu þessar samræður. Á brúðkaupsdag Harry og Meghan var þó ekki hægt að sjá að neitt ósætti væri milli bræðranna, heldur virðist sem að Vilhjálmur hafi sæst við ákvörðun yngri bróður síns og stutt hann á brúðkaupsdaginn. Ósættið situr samt víst fast í þeim bræðrum sem hafa farið mjög ólíkar leiðir í lífinu þegar kemur að hjónabandi.

 

 

 

 

View this post on Instagram

 

 

 

A post shared by Kensington Palace (@kensingtonroyal) on May 19, 2018 at 5:44am PDT

 

Harry og Meghan kynntust fyrst í júlí 2016 og giftu sig í maí 2018. Mörgum finnst það eflaust ekki svo stuttur tími en í samanburði við tilhugalíf Vilhjálms og Katrínar er það mjög stutt. Vilhjálmur og Katrín kynntust fyrst árið 2001 og giftu sig árið 2011, en þau hættu stuttlega saman árið 2007. Var mikið fjölmiðlafár á þessum tíma um af hverju Vilhjálmur væri ekki löngu búinn að biðja Katrínar. Ákvarðanir Vilhjálms koma eflaust út frá hans upplifun á hjónabandi foreldra sinna og skilnaðar þeirra. En Karl og Díana voru mjög stuttlega saman áður en þau giftu sig og hefur Vilhjálmur því viljað vanda valið þegar kom að hans eigin hjónabandi.

 

Harry hinsvegar var alls ekki lengi að biðja Meghan, en hann var lengi þriðja hjólið eftir að Katrín og Vilhjálmur giftu sig og orðið vitni að farsælu hjónabandi þeirra. Árin fyrir brúðkaup hans og Meghan fór hann ekki leynt með það að hann var tilbúinn til að finna sér maka og stofna fjölskyldu. Þegar hann hitti Meghan fann hann loksins maka sem var tilbúinn í að takast á við konungslífið með honum. Í trúlofunarviðtali þeirra kom skýrt fram að þau voru spennt fyrir að stofna fjölskyldu og hafa því viljað fara frekar hratt að hlutunum, sem þau hafa gert. Fréttirnar um að þau ættu von á Archie komu aðeins nokkrum mánuðum eftir brúðkaupið. 

 

Þó er seint hægt að tala um að stríð sé á milli bræðranna eins og heimildamyndin vill meina, en sú fullyrðing minnir mikið á gulu pressuna. Myndin er þó góð yfirferð á stöðu mála, en það hefur vakið mikla athygli hvað Vilhjálmur og Harry hafa lítið sést saman síðan Harry og Meghan giftu sig. Ég hef farið frekar yfir meint ósætti milli hertogahjónnana af Cambridge og Sussex í öðrum pistli og verð að segja að þessi viðvörun Vilhjálms og viðbrögð Harry, sé mjög líkleg skýring á öllu sem hefur verið að gerast. Þó svo að bræðurnir virðast vera komnir að mestu yfir þetta ósætti í dag, er ljóst að þeir vilja minnka samstarfið á milli sín og hafa smá fjarlægð meðan þeir skapa sína framtíð. 

 

 

 

View this post on Instagram

 

A post shared by Kensington Palace (@kensingtonroyal) on Apr 26, 2018 at 2:31am PDT

Afmælismyndir Georgs prins

Prins Georg á afmæli í dag, en sem elsta barn Vilhjálms og Katrínar, hertogahjónanna af Cambridge, er hann þriðji í erfðaröðinni að bresku krúnunni.

Prins Georg er í dag 6 ára, og eins og konunglegar hefðir segja til um voru opinberar myndir af honum gefnar út í tilefni dagsins. Í ár voru gefnar út þrjár myndir af prinsinum en allar myndirnar voru teknar af móður hans, Katrínu og er því frekar persónulegar. Georg prins hefur virst feiminn við opinber tilefni undanfarin ár og er gaman að fá myndir af honum þar sem hann er augljóslega mjög ánægður í sínu umhverfi.

Ein myndin er af prinsinum í fjölskyldufríi og má því áætla að myndin sé mjög nýleg þar sem Cambridge fjölskyldan er þessa daganna að hafa það gott í sumarfríi á einkaeyjunni Mustique í Karabíska hafinu. Þau munu síðan koma aftur til Bretlands í ágúst og verja tíma með fleiri meðlimum konungsfjölskyldunnar í Balmoral, einum af kastala Elísabetar drottningar í Skotlandi.

 

 

 

View this post on Instagram

 

 

A post shared by Kensington Palace (@kensingtonroyal) on Jul 21, 2019 at 2:32pm PDT

Hinar tvær myndirnar eru hinsvegar teknar í garði fjölskyldunnar við Kensington-höll og má sjá að prinsinn er byrjaður að missa barnatennurnar. Á myndunum er Georg klæddur í landsliðstreyju fótboltaliðs Englands, og er treyjan einnig merkt Nike. Cambridge krakkarnir sjást sjaldan í merktum klæðnaði eða í þekktum vörumerkjum, og er því nýtt fyrir almenning að sjá prinsinn svona klæddann. Augljóslega er hann samt mikill áhugamaður um fótbolta og gaman er að pæla í því að ungi prinsinn sé á opinberi mynd að sýna sinn stuðning við lið Englands fram yfir önnur landslið innan Bretlands. Einn daginn mun hann verða konungur Bretlands, sem telur England, Wales, Skotland og Norður-Írland, og frekar óvenjulegt að sjá meðlim konungsfjölskyldunnar taka svona afstöðu á opinberan hátt. Auðvelt er þó að benda á að Bretland á ekki fótboltalið og því eðlilegast fyrir prinsinn að velja það lið sem hann er búsettur í, England.

 

 

 

 

View this post on Instagram

 

 

A post shared by Kensington Palace (@kensingtonroyal) on Jul 21, 2019 at 2:32pm PDT

Opinberar myndir konungsfjölskyldunnar eru ennþá vinsælar þó svo að til sé endalaust af myndum af meðlimum hennar, en opinberar myndir eru hugsaðar sem leið til að styrkja samband konungsfjölskyldunnar við almenning. Undanfarin ár hafa myndirnar af Cambridge krökkunum verið teknar af móður þeirra og því persónulegri en ef þær væru teknar af opinberum konunglegum ljósmyndurum. Einnig eru þær í dag fyrst birtar á samfélagsmiðlum og fara því beint til almennings í staðinn fyrir að fara í gegnum fjölmiðla. Hinsvegar eru afmælismyndir, líkt og nýju myndirnar af Georg, vanalega birtar kvöldið fyrir afmælisdaginn til að fjölmiðlar geti notað myndirnar á deginum sjálfum. Skemmtilegt er líka að sjá að allar afmælismyndir Cambridge krakkanna í ár eru teknar úti í náttúrunni, en Lúðvík og Karlotta áttu afmæli í apríl og maí. Eitt af góðgerðarátökum Katrínar í ár er að hvetja fjölskyldur og krakka að vera úti í náttúrunni. Má því segja að myndirnar séu liður í átaki konungsfjölskyldunnar í að vera fyrirmynd bresku þjóðarinnar.

 

 

 

View this post on Instagram

 

 

 

A post shared by Kensington Palace (@kensingtonroyal) on Jul 21, 2019 at 2:32pm PDT

 

 

 

 

View this post on Instagram

 

 

 

A post shared by Kensington Palace (@kensingtonroyal) on May 1, 2019 at 2:31pm PDT

 

 

 

 

View this post on Instagram

 

 

 

A post shared by Kensington Palace (@kensingtonroyal) on Apr 22, 2019 at 2:30pm PDT

 

Tilkynningin um skírn Archie

Í gær var sent út tilkynning frá Buckinghamhöll um skírn Archie Harrison Mountbatten-Windsor, son Harry og Meghan. Skírnin verður haldin næsta laugardag, 6. júlí, en það er tveimur mánuðum eftir að Archie fæddist. Margir bíða spenntir eftir skírninni, en þá munu loksins koma fleiri myndir af nýjasta meðlimi konungsfjölskyldunnar. Skírnir verða oft til þess að við fáum flottar fjölskyldumyndir eins og þessa frá skírn Lúðvíks prins í fyrra.

 

 

 

View this post on Instagram

 

 

 

A post shared by Kensington Palace (@kensingtonroyal) on Jul 15, 2018 at 2:30pm PDT

 

Skírn Archie mun vera frekar lítil og fara fram í kappellu í Windsor kastala þar sem um 25 gestir munu vera viðstaddir. Hertogahjónin af Cambrigde, Katrín og Vilhjálmur munu vera viðstödd, ásamt Karli Bretaprins og Kamillu, og móður Meghan, Doria Ragland. Elísabet drottning mun ekki mæta en ástæðan mun vera sú að hún sé með annað planað. Elísabet var ekki viðstödd skírn Lúðvíks prins í fyrra, yngsta sonar Vilhjálms og Katrínu, af sömu ástæðu.

Í tilkynningunni í gær kemur fram að hertogahjónin séu spennt fyrir því að deila myndum frá viðburðinum sem verða teknar af ljósmyndaranum Chris Allerton, sem tók brúðkaupsmyndirnar fyrir Harry og Meghan. Munu því Harry og Meghan hafa fulla stjórn á hvaða myndir verða notaðar í fjölmiðlum. Fjölmiðlar munu ekki hafa neinn aðgang að viðburðinum, en vani er fyrir því að hægt sé að mynda gesti koma og fara frá skírnum. Þegar Karlotta prinsessa var skírð var almenningi einnig leyft að fylgjast með gestum koma og fara.



Það sem er áhugaverðast við tilkynninguna er að það verður ekki gefið upp hverjir eru guðforeldrar Archie. Stendur í tilkynningunni að það sé gert eftir óskum þeirra sem eru að taka að sér guðforeldrahlutverkið. Bresk konungleg börn fá oftast 5-7 guðforeldra og er ávallt gefið út hverjir það eru en það eru oft nánir vinir foreldranna. Í þessu tilviki má áætla að einhverjir guðforeldranna séu einhverjir af stjörnuvinum Meghan, sem þau vilja halda leyndu. Af hverju samt er spurningin. Sérstaklega þar sem hverjir eru guðforeldrar mun vera skráð á skírnarvottorð Archie, sem mun verða hluti af opinberum skjölum sem fjölmiðlar og almenningur getur seinna nálgast. Verður ekki langt þar til það verður ljóst um hverja er að ræða. Að koma með tilkynningu um að það verði ekki tilkynnt hverjir eru guðforeldrar er því frekar undarlegt.

Þetta er eitt af mörgu sem Harry og Meghan eru að gera öðruvísi sem er að fara illa ofan í fjölmiðla. Á Twitter hefur umræða komið upp að þessi tilkynning þeirra sé að búa til meiri vandræði fyrir þau en ef að þau myndu gefa út hverjir guðforeldrarnir eru. Þau eru í raun að fá fjölmiðla frekar upp á móti sér. Enda eru þetta upplýsingar sem munu aðeins vera leyndar í nokkra daga og er bara verið að gera fjölmiðlum erfiðara fyrir. Vilja fjölmiðlar í Bretlandi meina að Harry og Meghan séu að neita almenningi um rétt þeirra til að fylgjast með konungsfjölskyldunni, en Harry og Meghan er á því að þau séu að vernda barn sitt.

Þessi togstreita er erfið, en konungsfjölskyldan hefur oft átt í erfiðu sambandi við fjölmiðla. Harry og Meghan hafa að sjálfsögðu fullan rétt á að halda lífi Archie frá almenningi, enda ber hann engan konunglegan titil og hefur því engar konunglegar skyldur. Nafnið hans gefur skýrt til kynna að þau vilja að hann muni lifa sem eðlilegur breskur borgari og að hann muni geta valið hvað hann vilji gera í framtíðinni. Þó mun drengurinn fá titilinn prins þegar Karl verður konungur, sem barnabarn konungsins, nema að hann sjálfur eða foreldrar hans óski eftir öðru. 

Harry og Meghan hafa eflaust góðar ástæður fyrir sínum ákvörðunum, en það er leiðinlegt að sjá svona neikvætt umtal varðandi gleðiviðburð eins og skírn, og er erfitt að hunsa þá staðreynd að það hefði verið auðvelt að forðast þetta umtal með því að gefa bara út hverjir guðforeldrarnir eru. Þrátt fyrir umtalið mun þetta eflaust verða gleðidagur fyrir fjölskylduna og við munum fá að sjá flottar myndir af þeim Harry, Meghan og Archie. Vonandi koma myndir með fleiri fjölskyldumeðlimum, jafnvel af Cambridge-krökkunum og Archie saman.

 

 

 

View this post on Instagram

 

 

 

A post shared by The Duke and Duchess of Sussex (@sussexroyal) on May 8, 2019 at 6:34am PDT